Дэлгэрэнгүй
Татаж авах Docx
Дэлгэрэнгүй уншаарай
Хүний биед, хүн төрөлтний дотор таныг агуу гэдгийг тань мэдрүүлэх ямар нэг зүйл байдаг. Бидний дотор ямар нэг Зүйл байдаг бөгөөд Түүнийг олсноор бид Бурханаас ирсэн, Будда гэдгээ мэдэх болно. Бидний зарим нь энэ Зүйлийн нэг хэсгийг олсон. Бидний зарим нь Түүнийг бүтнээр нь олсон. Будда Түүнийг бүтнээр нь олсон. [Эзэн Бурхан] Есүс Түүнийг бүтнээр нь олсон, [Зөнч] Мухаммед (Түүнд амар амгалан оршиг), Кришна гэх мэт бусад олон Их Багш нар бас олсон. Тэд үүнийг бүтнээр нь олох үедээ Будда болсон. Тэд бүрэн гэгээрсэн. Тэд Бурхантай нэг болсон бөгөөд Тэд хаанаас ирснээ олж мэдэж, энэ бие махбодыг орхисныхоо дараа хаашаа явахаа мэддэг байсан. Тэгээд дараа нь Тэд бидэнд Буддагийн Мөн чанар бидний дотоодод байдаг гэдгийг хэлсэн. Тэд бидэнд Бурхан байдаг, тэрхүү Бурхан нь бидний энэ материаллаг сүмд оршдогийг хэлсэн. Хэрэв бид энэ гайхамшигт Чанар, энэхүү гайхамшигт Уг сурвалжийн нэг хэсгийг ч гэсэн дотоодоосоо олбол, бид илүү цэцэн, илүү ухаалаг, илүү аз жаргалтай, илүү амар амгалан, илүү хайраар дүүрэн байх болно. Энэ дэлхийн зарим хүмүүс энэ Агуу чанарын нэг хэсгийг олсон тул, Түүнийг олж чадаагүй бусад бүх энгийн төрөлтнүүдээс илүү агуу болсон. Гэхдээ бидний хүн нэг бүрийн дотоодод энэ Агуу чанар байдаг ба бид энэ Агуу чанарыг мэдэхээр сонговол эсвэл энэ Агуу чанарыг ашиглахыг хүссэн үедээ, бидэнд тэрийг сонгох боломж үргэлж байдаг. Энэхүү Агуу чанарыг буюу хамаг төрөлтний энэ анхдагч Өөрийн Мөн Чанарыг олохын тулд, бид зүгээр л зөв газраа, зөв аргаар төвлөрөх хэрэгтэй. Танд баярлалаа. Бүх зүйл, тэр ч бүү хэл энэ материаллаг ертөнцөд, бид ямар нэг зүйлд амжилт гаргахыг хүсвэл, бид төвлөрөх хэрэгтэй. Япончууд үүнийг хамгийн сайн мэддэг гэж би боддог. Японд олон компани ажилчдаа Буддын сүм рүү илгээж төвлөрлийн Зэн аргад суралцуулдаг бөгөөд ингэснээр тэдний компани илүү бүтээмж өндөртэй ажилчидтай болно. Магадгүй анхны бөгөөд цорын ганц үндэстэн биш юм аа гэхэд Япон бол дотоод төвлөрлийн хүчийг мэдэж, ухамсарладаг цөөхөн үндэстнүүдийн нэг гэж би бодож байна. Тийм ч учраас Япон улс олон талаараа маш амжилттай байгаа байх. Гэхдээ аз жаргалтай байж, илүү амар амгалан, мөнхийн аз жаргалтай байхын тулд, бид амьдралын илүү эрхэм зорилго, Орчлон ертөнцийн илүү эрхэм билиг ухаанд суралцах зорилгоор илүү өндөр хэмжээс рүү явахад төвлөрлөө ашиглах хэрэгтэй. Ингэснээр бид бүрэн бүтэн төрөлтөн болж чадах ба энэ ертөнцөд амжилттай удирдах ажилтан байх төдийгүй, харин бас дэлхий, орчлон ертөнцийг адислахын тулд гэгээнтэн, Будда болох болно. Зөвхөн бага зэрэг анхаарлаа төвлөрүүлж чадвал, хүмүүс энэ амьдралдаа аль хэдийн маш их амжилтад хүрч чадна. Тиймээс бид илүү их төвлөрвөл, зөв арга замаар илүү гүнзгий төвлөрвөл, бид Диваажинд ч амжилтад хүрэх болно. Бид хүссэн үедээ бие махбодын амьдралаа орхиж, Диваажинд очиж, Буддагийн Хаант улсад зочилж, дахин буцаж ирээд энэ гараг дээрх үүргээ биелүүлж мөн эсрэгээр нь үйлдэж чадна. Бид илүү ухаалаг, илүү амжилттай хүмүүст үргэлж атаархдаг. Магадгүй эдгээр хүмүүс дотоодын билиг ухаанаа хэрхэн ашиглахаа бидний заримаас илүү мэддэг байх. Тиймээс тэд маш ухаалаг, маш хурц ухаантай болсон бөгөөд тэд дотоод билиг ухааныг бүрэн ашигладаггүй бидний олонхоос илүү асуудлыг хэрхэн хурдан шийдэхээ мэддэг болсон. Тийм ч учраас Будда бидний хүн нэг бүрийг өөрийн Буддагийн Мөн Чанар, өөрийн билиг ухааныг олоход зоригжуулсан. Тийм ч учраас Библи бидэнд “Эхлээд Бурханы Хаант улсыг ол, тэгвэл эдгээр бүх зүйл та нарт өгөгдөх болно” гэж хэлсэн. Их Багш нарыг агуу болгодог, бидний хүн нэг бүрийг агуу болгодог Бурханы Хаант улсыг эсвэл Буддагийн мөн чанарыг бид ямар ч үед олж авч чадна. Учир нь бид анхнаасаа агуу юм. Photo Caption: Том эсвэл Жижиг, Бурхан Бүгдийг Хайрлаж, Халамжилдаг
