Энх тайвны үйлийн үрийн бүрхүүлийг хэрхэн илүү сайн нээх вэ, цуврал лекцийн 2-р хэсгийг

Ямар ч сүнс алдаа дутагдал сонгох юм уу урьд төрлийн үйлийн үрээс үүдсэн бүрхүүлгүйгээр төрөл авч чадахгүй. Тэд бүгд бүрхүүлтэй байх бөгөөд биет оршихуйд үргэлжлүүлэн оршин тогтноход нь таарч тохирох ертөнцөд тэднийг байршуулдаг. Учир нь төрлөөс төрөлд сүнс бүрхүүл дотор оршсоор ирсэн. Энэ бүрхүүл дотор холилдон хүний оршихуйг бүрдүүлж буй оюун ухаан, бие махбод, сэтгэл хөдлөл, авир араншин зэрэг элдэв бүх зүйл тэдэнд байх ёстой болно. Энэ бүхэн байгаа учраас тэд эргэн тойрныхоо бусад хүмүүстэй харилцдаг. Тэрхүү хоорондын харилцаа нь зөрчил, хайр, сэтгэлийн хүлээс, хамтын ажиллагаа зэргийг бий болгоно. Үүний улмаас бүр их үйлийн үр бий болсоор байдаг. Ийм төрлийн тогтолцоо нь юмыг бүр ээдрээтэй болгоно.

Будда хүртэл үй олон төрлийн өмнө, бүр цаглашгүй эрт дээр үеэс Будда болсон байсан ч энэ ертөнцөд дахин төрөл авлаа л бол ялгаагүй Тэд ийм бүрхүүлтэй байх ёстой. Эс бөгөөс энд байх боломжгүй. Тэр бүрхүүлийг Тэдэнд зориулан бүтээсэн байж болно, эсвэл Тэд Өөрийн Хүч, Авралаар Дээдийн Дээд, Цаглашгүй Хүчит, Хамгийг Болгоогч БУРХАНЫ ивээл дор, эсвэл Нэгдмэл Гурвал буюу Төгс Хүчит БУРХАН, БУРХАНЫ Хүү, мөн БУРХАНААР бүтээгдсэн БУРХАНЫ өөр нэгэн Хүүгийн ивээл дор бусад мунхаг төрөлтнүүдийг гэтэлгэж, шинэ шинэ Буддаг төрүүлэхийн тулд Өөрсдөө сонгосон байж болно. БУРХАНЫ хоёр хүү БУРХАНААС ирдэг Хүчээрээ бүр илүү ихийг бүтээж, улам олон ертөнцийг үүсгэж, эсвэл янз бүрийн гараг ертөнц дэх улам олон тооны бүтээгдсэн төрөлтөнд бүр илүү тусална.

Тиймээс ч Шагжамуни Будда хааны гэр бүлд төрж, дараа нь олон олон татвар эмтэй, бүр таван зуун татвар эмтэй байх шаардлагатай болсон. Гэхдээ эртний Энэтхэгт ингэж хэлдэг байсан нь маш, маш олон гэсэн утгатай. Яг таван зуу гэсэн үг биш. Заримдаа хоёр мянга гэж хэлдэг нь жирийн хүмүүсийн төсөөлж ч чадахааргүй маш их, асар их тоо юм. Хэн ч гэртээ, эсвэл орчиндоо хоёр мянган хүнтэй байхгүй. Буддад хоёр мянган лам байсан гэдэгтэй адил. Яг хоёр мянга гэсэн үг биш. Илүү олон байж болно, цөөн ч байж болно. Гэхдээ эртний тоо, илэрхийлэл, дүрслэлээр асар олон гэсэн утгатай. Буддад үнэндээ ямар ч хүсэл шунал байгаагүй. Будда таван зуун эмэгтэйг эхнэрээ, эсвэл татвар эмээ болгохыг хүсэх нь байтугай тухайн үеийн гүнж, тухайн үеийн эхнэртэйгээ гэрлэхийг ч хүсэхгүй байх байсан. Тэр Рахула гэдэг хүүтэй болохыг хүсэхгүй байх байсан.

Гэвч тийнхүү зохицуулагдсан. Энэ ертөнцөд ирсэн хүн бүр сорилт шалгалтад орох ёстой. Амьдралын тань эргэн тойронд, яг урд тань, амьдрал дотор тань урхи, арга мэх, шалгалт сорилго тавьж, бүх уруу таталтаас аажмаар, эцэстээ, эсвэл шууд мултран гарч, салж чадах эсэхийг тань хардаг. Энэ нь тухайн Их Багш буюу тухайн Будда хэдэн шавьтайгаас хамаарна. Түүний аврах хүмүүсийн үйлийн үрээс болоод тэр бүх үйлийн үрийг тооцоолж, тухайн Буддагийн амьдралд асар их зовлон тарьдаг. Хэн нэгэн тэдний үйлийн үрийг төлөх ёстой. Бүх хүн үйлийн үртэй. Тэгээд Тэр үүнийг хүлээн зөвшөөрсний дараа, Түүнийг бүр төрөхөөс өмнө амьдралынх нь зураг төөргийг харуулдаг. Будда төрөхөөсөө өмнө тэр бүхнийг мэдэх ёстой байсан байх нь. Хэчнээн хүнийг, ямар төрлийн хүмүүсийг хаана, хэзээ аврах гэх мэтээр тэр бүхнийг Тэрээр хүлээн зөвшөөрөх ёстой байсан.

Буддагийн овог аймаг аймшигтайгаар дарлуулж, шархдаж, гэмтэж, аль муугаар доромжлуулж байхад Будда үүнийг шийдэх гэж Хүчээ ашиглаж чадаагүй. Учир нь энэ нь тэдний үйлийн үр байсан. Тэд урьд өмнөх төрлүүддээ, эсвэл энэ насны амьдралдаа ямар нэг юм хийсэн байсан. Энэ нь хөрш хаадын нэгийг шивэгчин эхээс төрсөн гэж доромжилсноор эхэлсэн. Хөрш улсын хааны гэрлэхийг хүссэн жинхэнэ гүнжийн оронд тэд нэгэн шивэгчнийг гэрлүүлж зохицуулсан явдал байсан аж. Тиймээс энэ улсын бүх хатан, татвар эм үүнийг мэддэг байжээ. Ингээд хаан эхийнхээ нутгийг зорин ирэхэд тэд бүгд түүнийг доромжилж “Чи бол ердөө нэг шивэгчний хүү. Чи бол юу ч биш. Ийм их зантай, сүр хүчтэй, өндөр дээдэс мэт бүү авирла.” гэх мэт зүйл хэлжээ. Тэгэхэд нь өнөөх хаан машид хилэгнэж, дараа нь ирж бүхэл овгийг төсөөлшгүй хэрцгий байдлаар устгасан.

Тэгэхээр энэ ертөнцөд заларсан Будда нар, Хэн нь ч улс төрийн зөрчилдөөнд оролцох, энх тайван тогтоох, эсвэл Өөрийн ид шидийн хүчээр дайныг зогсоох гэх мэт зорилго өвөрлөж ирдэггүй. Гэртээ харихад бэлэн бөгөөд харихыг хүссэн аливаа сүнсийг аварч гэтэлгэх нь л Тэдний эрхэм зорилго юм. Тэгсэн ч Тэдний амьдрал харгис хувь тавилантай байсаар ирсэн. Та нар олон Их Багшийн намтрыг уншсан болохоор хүмүүс Тэдэнд хамгийн хэрцгийгээр хандаж байсныг мэднэ. Та нарын мэдэх хамгийн сүүлийн жишээ нь бидний Их Эзэн Есүс. Тэр ямар ч буруу зүйл хийгээгүй. Тэр зөвхөн зөв шударгыг номлож, зөвхөн БУРХАНЫ Хаанчлалыг л номлосон. Тэр газар Дэлхий дээрх хаанчлалыг огт хайхраагүй. Хүмүүс Түүнийг магтаж, еврейчүүдийн Хаан хэмээх цол өгсөн ч энэ нь Эзэн Есүсийн зорилго огт биш байсан. Тэр энэ ертөнцийн явдалд огт санаа тавиагүй.

Тэр бүр “Үхэгсэд үхэгсдээ оршуулаг.” гэж хэлсэн. Энэ нь Тэрээр хэдэн хүнийг аварч чадахаа мэддэг байсан, харин бусад нь алхаж, ярьж байсан ч үхсэн гэсэн утгатай. Үхэл гэдэг зөвхөн бие махбодынх биш. Хэрэв БУРХАНЫГ мэдэхгүй, хэрэв сүнс тань үйлийн үрийн ачаа, мунхаглал, хараагдсан хувь тавилангийн нэвтэршгүй хананд бүрхэгдсэн бол аль хэдийн үхсэн гэсэн үг. Сүнс тань хоригдсон мэт, эрх чөлөөгүй бөгөөд та үнэхээр Гэртээ харихыг, БУРХАНЫГ дахин мэдэхийг, өөрийг тань аврах Их Багштай учрахыг үнэхээр хүсэх хүртэл тийнхүү мөнх үргэлжилнэ.

Энэ гарагийн төрөлтөн бүрийн асар хүнд үйлийн үрд ингэтэл булагдсан дэлхийд ямар ч Их Багш яаж тэдэнд энх тайвныг тогтоож чадахыг төсөөлөөд үз. Хамаг Диваажин болоод Дэлхийн хаана ч алдар суутай, Ертөнцөд хайрлагдан хүндлэгдсэн Шагжамуни Будда хүртэл Өөрийн овгийг энэ аллагын үйлийн үрээс аварч чадаагүй. Мөн тэд амаа хамхиж, хожим хүчирхэг хаан болсон тэр хүүхдэд илүү энэрэнгүй, хайртай, эелдэг байсан бол үүнээс зайлсхийж болох байв. Хувь тавилан нь түүнийг нэгэн улсын хаан болгосон тул тэд түүнийг зүгээр л угтан авч, хайр, хүндэтгэлээр бялхааж болох байсан. Гэвч тэгээгүй. Тэд түүнийг тэсэхгүй болтол нь шоглож, эцэс төгсгөлгүй доромжилсон. Тиймээс эрт үед хүмүүс “Ярихаасаа өмнө долоон удаа тунгаан бод.” гэж хэлдэг байв. Мөн үг тань сум шиг байж болно, хаа хамаагүй санамсаргүй бүү харва гэж сэрэмжлүүлдэг зүйр үг бий.

Одоо манайх шиг ийм ертөнцөд энх тайван тогтоох маш хэцүү. Учир нь бүрхүүлүүд дотроо элдэв зүйл, элдвийн үйлийн үр агуулж байгаа. Тийм учраас аливаа энх тайван тогтнох гэж ихэд уддаг. Өмнөх удаа Европын энх тайван хурдан шийдэгдсэн. Учир нь би Европ даяар явж, хоёр өдөр тутамд нэг улс руу очиж чадсан. Хүмүүс миний хийсэн зүйлийг аюултай байсан гэж хэлдэг. Үгүй, үгүй, тэр үед хараахан аюултай байгаагүй. Учир нь би хаа сайгүй алдартай болоогүй, мөн дайнд хөндлөнгөөс хэт орооцолдож, удирдагчдыг гомдоохоор шулуухан үг хэлчихдэг байгаагүй. Харин одоо өөр болсон. Би тэвчиж чадсангүй. Би тэгэх хэрэггүй л байж. Би үг хэлээрээ ч дайнд оролцох ёсгүй байсан юм. Гэвч хүмүүс зовж, гэр орноосоо дүрвэн, замдаа, эсвэл насан туршдаа үе удмаараа хайрлаж амьдарсан газар нутаг, эх орноосоо өөр хаа нэгтээ үхэж үрэгдэж, хамаг бүхнээ алдаж байгааг хараад би тэсээгүй юм. Би тэвчиж чадсангүй. Би үнэндээ тархиараа урьдчилан хянахгүйгээр шууд л хэлчихсэн. Ийм байдал маань надад бас хар тамхины хүмүүстэй холбоотой олон асуудал авчирсан.

Photo Caption: “Зөвхөн хүмүүс л уран бичлэгийг таашааж чадна гэж бодож байна уу?”

Зураг татаж авах