Дэлгэрэнгүй
Татаж авах Docx
Дэлгэрэнгүй уншаарай
Чин сэтгэлт Хайгч БУРХАНЫГ Олно “Хэрвээ бидэнд сайхан зүйл байвал, бид тэднийг бусадтай хуваалцах хэрэгтэй. Үүний адил, БУРХАН өчүүхэн надад хүртээсэн сүнслэг адислалаа мэдэхийг хүссэн хүн бүртэй хуваалцахыг надад тушаасан. Би БУРХАН болон орчлон ертөнцийн тухай эргэцүүлж эхлэхдээ маш балчир байлаа. БУРХАН ямар дүр төрхтэй вэ гэх мэт асар том асуултуудаа би хэнээс асуухаа мэддэггүй байв. Би ТҮҮНИЙГ яаж харж чадах вэ? Би ТҮҮНД хүрч болох уу? Би ТҮҮНИЙГ тэвэрч болох уу? (Учир нь би их балчир байсан, бас тэврэх дуртай байв.) Анх өөртөө эдгээр асуултыг тавьснаас хойш олон жил өнгөрсөн ч, би үнэн хариуг олж чадаагүй байв. Тиймээс эмээгээ даган Буддын сүмд очиж Буддад залбирч, аавыгаа даган Христийн сүмд очиж БУРХАНД залбирдаг байлаа. Би мэддэг бүхэндээ залбирсан. Би Буддын Судар болон Христийн шашны Ариун Бичээсүүдийг уншихыг хичээсэн ч төдийлөн ойлгодоггүй байв. Би бүр Библитэй хамт унтдаг байсан. Орой бүр Библийг тэврээд унтдаг байв. Би БУРХАНД үргэлж залбиран, ‘Та надад Өөрийгөө харуулж чадах уу? Та надад Өөрийгөө буюу хамгийн Дээд БУРХАНЫГ, хүмүүний бүх саад хязгаараас дээгүүр орших БУРХАНЫГ, шашны бүх ялгаанаас ангид БУРХАНЫГ, үзэн ядалт, арьс өнгөөр ялгаварлах үзлээс дээгүүр БУРХАНЫГ харуулж чадах уу? гэж хэлдэг байв. Та надад харуулж чадах уу? Би Таныг юу юунаас илүү танин мэдэхийг хүсэж байна гэдэг байв.” БУРХАН байдгийг би ямар нэгэн байдлаар мэдэрдэг ч, харж чаддаггүй байсан тул харахыг л хүсдэг байлаа. Тиймээс ТҮҮНТЭЙ холбогдохын тулд олон арга туршсан ч бүтэлгүйтсэн. Гэтэл нэг өдөр ТЭР намайг сүнслэг зам руу хөтлөөд оруулчихсан. Тэр замаар явбал БУРХАНЫГ танин мэдэж чадна, бас энэ бүхэн хурдан болно гэж ТЭР надад хэлсэн. Түүнээс хойш би Эцэгтэйгээ өдөр бүр улам дотно танилцсаар ирсэн. Мөн ТЭР надад дэлхий ертөнц рүү гарч, хаана ч намайг урьж дуудсан газарт очиж, ТЭР та бүхэнд маш их хайртай гэсэн захиасыг дамжуулж байхыг даалгасан. Хэрэв та нар ТҮҮНИЙГ харахыг хүсвэл, би та нарт замыг нь заах ёстой. Энэ бол маш хүнд сорилттой ажил бөгөөд над шиг жижиг биетэй эмэгтэйд тохирох ажил гэж би өөрөө ч бодож үзэхээргүй үйл эрхлэлт юм. Гэвч БУРХАН, ‘Би чамд шаардлагатай бүх хүчийг өгнө; чи Надад үргэлжлүүлэн үйлчил, бусад бүхнийг Би өгнө’ хэмээн айлдсан. Энэ зам надад төдийгүй БУРХАНЫГ эрэлхийлсэн олон мянга, бүр хэдэн зуун мянган хүнд үр дүнгээ өгсөн. Тиймээс хүн бүрд үр дүнтэй гэдэгт би итгэлтэй байна.” Хайрын Хуулиар Амьдрах нь: Арван Зарлиг “БУРХАН Арван Зарлигаар дамжуулан хайрын хуулиар амьдрахыг бидэнд сануулсан билээ. Учир нь бид БУРХАН эсвэл БУРХАНЫ хүүхдүүд юм бол, БУРХАНЫ зам болох хайрын замаар амьдрах учиртай. Арван зарлиг нь БУРХАНЫ Зарлиг биш. Учир нь Тэр бидэнд хатуу ханддаггүй. ТЭР туйлын энэрэнгүй. Бид хэчнээн нүгэлтэй байсан ч, Тэр биднийг хайрладаг. Арван Зарлиг бол ердөө л БУРХАНЫ хүүхдийн, эсвэл энэ гараг дээр алхаж буй БУРХАНЫ мөн чанарууд юм. Тиймээс бид БУРХАНЫ яруу алдрыг тунхаглахыг хүсвэл, бид Арван Зарлигт нийцэж, хэм хэмжээнд нь хүрэх ёстой. Тэгвэл мэдээж бид бие биеэ хайрлаж, байгаа зүйлээ хуваалцаж, нэгнээ хөнөөхгүй гэх мэтээр амьдарна. Эдгээр нь амьд БУРХАНЫ мөн чанарууд юм.” БУРХАНЫ Бэлэг Бид бүгдийнх “Асуулт: ‘Яагаад энэ сонголт Танд оногдсон юм бэ, ялангуяа энэ бэлэг Танд өгөгдсөн юм бэ? Гол нь яагаад энэ бэлгийг онцгойлон Танд өгсөн юм бэ?’ Их Багш хариулав: ‘Би ч бас ТҮҮНЭЭС үүнийг асууж байсан. ТҮҮНИЙ хүсэл биелэх болно. Надад ямар ч нөлөө байхгүй. Гэхдээ та хүсвэл мөн адил хийж чадна. Хэзээ нэгэн өдөр ТЭР танд ч үүнийг хийхийг хэлнэ. Бид бүгд яг адилхан хийж чадна. Гагцхүү БУРХАН бидний ойлгож чадахгүй арга замаар бүхнийг зохицуулдаг. Гэхдээ бид хоёрт ялгаа байхгүй. Надад байгаа бэлэг танд ч бий. ТЭР үүнийг бид бүгдэд өгөхийг хүсдэг. Тиймээс ТЭР намайг ирж, та нарын бэлгийг сануулаарай гэж хэлсэн. ТЭР үүнийг зөвхөн надад өгөөгүй. Би та нарт өөрсдийн тань бэлгийг харуулахаар ирсэн. Хэрэв та Та өөрөө үүнийг олж мэдэхийн оронд би яаж энэ захиасыг танд хүргэж чадаж байгаа юм бэ гэж асууж байгаа бол хариулт нь гэвэл, би үүнийг аль хэдийн мэддэг, харин та хараахан мэдээгүй учраас тэр. Тиймээс би мэддэг зүйлээ танд үзүүлж, ойлгуулж чадна. Хожим нь та мэддэг болсон хойноо бусдад ч бас үзүүлж, ойлгуулж чадна. Бид өдөр ирэх тусам БУРХАНЫГ улам бүр танин мэдэж, ТҮҮНТЭЙ дахин дотно танилцах болно. Тэгээд нэг өдөр ТЭР танд, ‘Одоо та явж бусад бүх хүнд хэл; Та энэ мэдлэгийг хуваалцах чадвартай болсон’ гэж айлдаж магадгүй. Тэр үед ‘та’ гэж байхгүй, ‘би’ гэж байхгүй болж, зөвхөн таны оршихуйгаар дамжин үйлдэх БУРХАН л байх болно.’” БУРХАН Өс хонзонгоос Ангид “Асуулт: ‘БУРХАНЫ шударга шүүлт хэзээ ирэх вэ?’ Их Багш хариулав: ‘Би зөвхөн БУРХАНЫ Нигүүлсэл хэзээ ирэхийг мэднэ. Би уур хилэнтэй Бурханыг мэдэхгүй. БУРХАН нигүүлсэнгүй, хайр энэрэлтэй, бүхнийг өршөөдөг гэдгийг л би та нарт хэлэхээр ирсэн. Хэрэв та энэ БУРХАНЫГ танин мэдэхийг хүсвэл, би та нарт харуулж чадна. Таны асууж байгаа зүйл бол хариу шийтгэлийн тухай юм; энэ бол бодит, биет ертөнцөд хамаарна. Бидний хийсэн бүхэн үр дагавар бий болгоно. Энэ нь аяндаа явагддаг. Энэ нь БУРХАНЫ хүсэл ч биш, БУРХАНЫ үйлдэл ч биш; энэ нь ердөө л аливаа үйлдлийн үр дагавар. Тиймээс бид юу ч хийсэн, үр дагаврыг нь урьдчилан бодож үзэх хэрэгтэй. Үйлдэл тань хангалттай сайн биш байснаас таагүй үр дагавар гарвал БУРХАНЫГ бүү буруутга. Аливаа үйлдлийн үр дагавар маш энгийн. Хэрвээ та сарнай таривал, өөр зүйл биш, сарнай л цэцэглэнэ. Харин БУРХАН энэ бүхнээс дээгүүр оршдог. БУРХАН бол бүхнийг хайрладаг, бүхнийг өршөөдөг. БУРХАН бидэнтэй үргэлж хамт; ТЭР биднийг хамгаалж, хүссэн бүх аз жаргалыг маань өгөхийг хүсдэг. Үүнийг хүлээн авахын тулд бид ТҮҮНТЭЙ холбогдох л хэрэгтэй.’ Асуулт: ‘БУРХАН 2001 онд бидэн дээр ирнэ гэдэг үнэн үү?’ Их Багш хариулав: ‘Хэрэв та нар ТҮҮНИЙГ та нарт харуулахыг надад зөвшөөрвөл, ТЭР хоёрхон секундийн дотор ирнэ.’ Асуулт: ‘Та БУРХАНЫГ зүүдэндээ хардаг уу?’ Их Багш хариулав: ‘Үгүй, зүүдэндээ биш, хүссэн үедээ хардаг. БУРХАНТАЙ дахин холбогдсоныхоо дараа та ТҮҮНИЙГ хүссэн үедээ харж чадна. Зүүдлэх шаардлагагүй. Та сэрүүн байхдаа ТҮҮНИЙГ харж чаддагаа ухаарна. Хэрвээ унтаж байвал та мэдэхгүй шүү дээ.’”
